ازاي ننسى الماضي المؤلم

 كل واحد فينا بداخله الصندوق الاسود اللي شايل ذكريات كتييير قوي في منها الحلو وفي منها الوحش  طب ليه الوحش كل شويه يجيلنا

 ويفضل يرخم علينا عالفاضي والمليان طب ماتيجي نسال هنا سؤال هو ينفع نغير الماضي؟ طب مافيه سؤال اهم انا محتاج اغير

 الماضي؟ ازاي ارجع لحاجه انتهت من زمن والعب فيها؟ معظمنا عنده مشكلة في حياته او شخص معين مش عارف ينساه سواء حبيب

 او صديق او ممكن مثلا عميل في الشغل اوموقف معين اتحطينا فيه ومش عارفين نتصرف فيه فسببلنا ذكرى وحشة والموضوع دا

 مسيطر علينا وبيجيلنا كل شويه يرخم علينا وبرضو مش عارفين ننساه ونبدا نسال نفسنا السؤال اللي كلنا بساله انا اصلا شخص

 ذاكرتي ضايعة يبقى اشمعنا الموضوع ده او الشخص دا بالذات مش عارف انساه ...

 حقيقة عن الماضي 

الحقيقة الماضي بيشكل جزء كبير جدا من الحاضر بتاعنا والمستقبل اللي رايحين عليه التجارب اللي مرينا بيها سواء سلبية او ايجابيه هي اللي بتشكل شخصيتنا وردود افعالنا تجاه العالم اللي حوالينا  الماضي  رغم انه مالوش و جود وسطنا الوقتي الا انه عامل زي قوة  مسيطرة بتتحكم في حياتنا عشان تعرف تغير الماضي محتاج تعرف ايه هو الماضي اصلا لو جيت بصيت هتلاقي الماضي عبارة عن شئ وهمي مس وموجود الوقتي حاجه خلصت من فترة طويله قوي وعدت بقى مكانها شوية ذكريات تفضل تلف وتروح وتلف وتروح لحد ماتلاقي وقت معين تعرف تصطاد مشاعرك فيه وتاثر عليك وطبعا دا بياثر عالحاضر بتاعك والمستقبل اللي انت رايحه طب الذاكرة اصلا بتبقى شايله الافكار دي بتشتغل ازاي وليه الافكار دي تحديدا اللي بفتكرها فيه تجارب كتير قوي اتعملت على موضوع النسيان ده وبالذات موضوع الذاكرة وهكلمكم عن تجربة معينه اتعملت من 6 سنوات في جامعة كاليفورنيا الدراسة دي كانت بتحاول تفهم يعني الذاكرة او النسيان تحديدا وصلوا ان ذاكرة الانسان مش حاجه ثابته يعني حاجه مش عاملة زي المخزن او الدولاب  اللي هو مجموعة افكار يوم مااحب اطلع حاجه اخش اسحبها اتفرج عليها وافتكرها وارجعها تاني لا الذاكرة عبارة عن حاجه ديناميك او حاجه متغيرة لما احب افتكر فكرة معينه كاني بسلط عليها ضوء التركيز بركز فيها ببدا افتكر كل تفاصيلها واعيش الحالة بتاعتها ولما بتعمل كده فانت بتقوي الروابط العصبية المسئولة عن الذكرى دي بتخليها دايما حاضرة جوة دماغك فالعقل بيبدا يعطي اهتمام للذكرى دي وينسى مع الوقت الذكريات التانيه دي ماانا اعطيت اشارة للعقل ان الذكرى دي بس اللي مهمه وباقي الذكريات  مش مهمة فينسى التانيين ويركز على دي ويفكرك بكل تفاصيلها والكلام ده على فكرة خطير جدا انت عارف انت بتعمل ايه انت كانك قاعد بتحفرها جوه دماغك وبتثبتها اكترى عشان تعيش نفس الحالةاللي كنت عايشها قبل كده فانت تقريبا بتعيد انتاج نفس الوجع تاني  تاني وبتزيد  فيه فبالتالي يتاثر الحاضر والمستقبل تاثير سلبي بسبب حاجه مالهاش وجود في حياتك الوقتي

هقولك تعمل ايه بس قبل مااقولك محتاج اسالك سؤال واحد بس هي مش الذكري دي عدت خلاص طب ليه انت حابب تعيش في الماضي الماضي ده عبارة عن شوية افكار لو حاولنا اننا نغير نظرتنا ليها هتلاقي الماضي تلقائي بدا يتغير معايا عشان طريقة نظرتنا هي بتحدد طريقة تاثيرها عليا سواء بالسلب او بالايجاب تجربة عاطفية مريت بيها ومانجحتش هل معنى كده انم ماتستحقش او ان انت وحش لا بالعكس ممكن تشوف حاجات كتييرةجدا زي مثلا انك عرفت تفرق بين الصح والغلط في الوقت المناسب او نقول الحمدلله اننا خرجنا منها على كده لعله خير الله اعلم كان ممكن يحصل ايه ومش معنى انك مانجحتش في انترفيو معين انك فاشل اوان انت ما تستحقش المكان ده لا هي تجربةوعدت واكيد انت اتعلمت منها حاجه بمجرد ماتفهم المشكلة كانت في التجربة دي ايه بتعرف بتصلحها في اللي جاي مابتوقعش نفس الوقعة يعني بتتعلم من اخطاءك مشروع عملته مثلا وفشل مش معنى كده ان المشروع وحش او ان انت فاشل بص للوضوع منحته تانية ممكن يكون فيه شوية اسباب صغيرة جدا هي اللي وصلتك للنتيجة دي او ان انت ماكنتش جاهز كفاية للمشروع ده لكن مش معنى كده ان انت وحش  لازم تفهم المشكلة فين لازم تفهم ايه اللي بيحصل ليه دايما بننظر لنص الكوباية الفاضي الفكرة ان طريقة نظرتنا لكل حاجه هي اللي بتحدد شكل الذكريات عندنا عامل ازاي هي اللي بتاثر عاللي فات وتدمر اللي جاي لو انت في ذكرى معينة في دماغك سلبية وكل شوية تجيلك وتعكنن عليك واكيد كلنا كده او عدينا حاجه زي كده فحاول تفكر فيها واحنا بنتكلم الوقتي وحاول تفتكر ذكرى تانية ايجابية وياريت تكون حصلت في نفس الوقت ده حاجه فرحتك خبر كويس اي حاجه اثرت على مشاعرك تاثير ايجابي سفرية حلوة مع اصحابك وياريت تفتكر كل تفاصيلها جمع كمان ايه اللي كنت لابسه كنت مع مين كنتم بتعملوا ايه اي تفصيله ولوكانت مش مهمة اليوم كان عامل ازاي الساعة كانت كام حاول تجمع تفاصيل اليوم كله اختار الوقتي يلا وانت بتقرأ كلامي ده اختار اي ذكرى ايجابية حصلت في نفس الفترة دي وابدا يلا كل مايجيلك الذكرى السلبية دي حط مكانها مكانها الايجابية دي وهكذا اهتم بيها اكتر خليها حاضرة دايما في دماغك عشان تاخد مكان الذكرى السلبية دي وخلي بالك التجربة اللي احنا بنجربها مع بعض الوقتي دي ذكرى ايجابية فهتخليك ايجابي كل ماتفتكرها تاني حاجه لما بتبدا تفتكرها بكل تفاصيلها بتبدا تعطي طاقة تركيزاكتر عالذكرى دي وفي نفس الوقت بتقلل طاقة التركيز اكتراللي رايحة للذكرى التانية السلبية فالذكرى الايجابية تبدا في التقدم والسلبية تبدا في التراجع بالتدريج لانك ما بتفكرش فيها والحاجه التانية لما بتركز مع الذكرى الايجابية دي بدات تتحفر في دماغك زي ماقولنا من شوية واكيد دي حاجه كويس كدا عشان الذكري دي كانت حلوة وياريت تفتكرها كل شوية العملية دي اسمها النسيان المحفز بالتذكيريعني نفس العمليه اللي بتعملها عشان تفتكر الذكرى السلبية بس بنغير الذكرى من سلبية الى ايجابية وبكده التاثير السلبي اللي بياثر على الحاضر والمستقبل بتاعك اتحول الى تاثير ايجابي كده كده الماضي حصل والذكرى مش هتعرف تشيلها من دماغك بس عالاقل ماتفتكرهاش تاني او انساها مع الوقت بان كل ماتخطر على بالك تلهي نفسك بحاجه تانية لحد ماعقلك يفهم انها مش مهمة وتنساها تماما انت ياسيدي الماضي انتهى انت ليه عمال تفتكرفيه كل شوية مانت كده بتضر نفسك

وقبل ما نتنقل للخلاصة انا هرد على سؤال في الغالب هتسال لي ان الكلام ده اكيد كلام كتب او كلام نظريات ومش من السهل ان الواحد يعمل كده دا  مهما كان كلام وخلاص وانه من شبه المستحيل ان حد يعرف  ينفذ ده هل الصعب عليك انك تدرب نفسك على طريقة معمول عليها دراسات وممكن فعلا تجيب نتيجة معاك وتغيرلك حياتك خصوصا ان ده علم ولاتفضل كل حياتك عايش جوة دولاب الذكريات وكل شوية تتطلع منها حاجه وتدمر نفسيتنا زيادة ايه الاصعب وايه اللي ممكن يكون فيه الحل وايه الاهم بالنسبة لك

الخلاصة

لازم تبقى عارف ان الماضي ده ذكريات عدت من فترة طويلة قوي ومش هترجع تاني انت بس اللي تقدر ترجعها وطالما ان القرار بايدينا يبقى نرجع الحلو  بس ومانرجعش الوحش مش مهم ايه اللي حصل معاك او حصل ازاي او الذكرى دي عاملة ازاي المهم اللي حصل ده انت شايفه ازاي طب ماممكن اللي حصل ده يكون حصل بطريقة ايجابية وانت شوفته بطريقة سلبية يعني المشكلة في طريقة نظرتك للموضوع حاول دايما تنظر لنص الكوباية المليان مش الفاضي ماتحاولش تضايق نفسك كتير. الفترة اللي جاية ان شاء الله هنتكلم عن مشاكل بتحصلنا في حياتنا وازاي نحلها بطريقة بسيطة وسهلة وعلمية من اكتر من بحث واكتر من كتاب بطريقة جميلة جدا ان شاء الله ولو  فيه اي مشكله تحب ان انا اتكلم فيها ياريت تكتبها في تعليق او رساله عالخاص عن طريق البريد الالكتروني وان شاء الله هنحلها بشكل كافي ووافي 

اتمنى اكون وصلت الموضوع بشكل بسيط  ومفيد  

                                                                    

                                                             **  وشكرا جزيلا  **

د / محمد عرابي